Kultura hizpide Languages Lanean Kongresuko bigarren egunean
Languages Lanean Kongresuaren bigarren egunean, kulturaren esparruan hizkuntzaren kudeaketak duen garrantzia izan da hizpide Guggenheim Bilbao Museoan. Horretarako kultur eremuko sortzaile eta eragile desberdinek hartu dute hitza.
Lehenengo blokean, erakunde gisa hartzen diren hautuez eta egiten diren praktikez eta hizkuntzen kudeaketak ekimen edo topaketetan duen eraginaz hausnartu dute Guggenheim Museoko Nerea Virtok, Euskadiko Orkestrako Oriol Rochek,Tolosako Nazioarteko Abesbatza Lehiaketako Xabier Ormazabalek eta Durangoko Azokako Beñat Gaztelurrutiak. Lau hizlariek beren erakundeen egunerokotasunean hizkuntza-kudeaketak duen garrantzia eta erabilitako hizkuntza irizpideak azaldu dituzte.
Bigarren blokean Esti Urresolak (20.000 especies de abejas) eta Pello Reparazek (ZETAK) kultur sorkuntzaren arloan indibidualki hartzen diren hautu linguistikoei buruz hitz egin dute.
Esti Urresola zinemagileak “hizkuntzak mundua ikusteko modua” baldintzatzen duela adierazi du, eta horregatik 20.000 especies de abejas pelikulan narratiboki hain garrantzitsua zen euskara “marka genero aldaketa erakusteko helburua zuelako. Pelikula bere horretan grabatzeko borrokatu behar izan nuen lana baldintzatzen zuelako askotan (kasting-a, lan taldea...), baina elementu ezinbestekoa zen filmarentzat”.
Pello Reparazek, euskarak ate gehiago ireki dizkiola itxi baino esan du: “ZETAK beste hizkuntza hegemoniko batean egin izan bagenu, beharbada ez luke hainbesteko arrakasta izango. Mundu geroz eta globalizatuago batean, desberdintzeko faktoreak bilatu behar dira, eta euskarak munduan ZETAKen sonoritatea duen beste proiekturik ez egotea eskaini digu”.
Josune Zabalak kongresuari itxiera eman dio izena eman dutenei eta hizlari guztiei eskerrak emanez. “Eskerrak bereziki Europako ordezkariei. Begiak ireki dizkiguzue nazioartean hizkuntzak nola kudeatzen dituzuen kontatu diguzuelako eta erdigunean pertsonak eta aniztasuna jartzearen garrantzia azaldu diguzuelako. Hizkuntzen kudeaketan irtenbide bakarra ez dagoela erakutsi diguzue”.
